অসমত ফ্ৰেড্ৰিক ফৰছইথ

ইংৰাজী উপন্যাসৰ লগত মোৰ চিনাকী ১৯৮৭চনৰ পাছত ৷
কলেজ হোষ্টেলত মোৰ অন্তৰংগ বন্ধু পদুম বুঢ়াগোহাই আৰু সংলাপ নাহৰ ডেকাই বৰকৈ ইংৰাজী উপন্যাসবোৰ পঢ়ে ৷ এদিন ময়ো আৰম্ভ কৰিলো পঢ়িবলৈ ৷ প্ৰথম কোনখন পঢ়িছিলো মনত নাই ৷ তথাপিও প্ৰথম অৱস্থাত ছিডনী ছেলডন, ৰবাৰ্ট লুডলাম, ফ্ৰেড্ৰিক ফৰচইথ, জেফ্ৰী আৰ্ছাৰ আদিকে পঢ়িছিলো ৷ পঢ়ি বেছ ৰস পোৱা হ’লো ৷

বেছি ভাগ উপন্যাসতে মন কৰিছিলো কাহিনী আৰম্ভণি আমেৰিকা বা পৃথিবীৰ যি কোনো এখন দেশত হয় ৷ তাৰ পাছত কাহিনীৰ নায়ক, খলনায়ক তথা ঘটনা লেটিন আমেৰিকা, আফ্ৰিকা, অষ্ট্ৰেলীয়া বা জাপান আদি দেশ পায় গৈ ৷ প্ৰতিখন দেশ প্ৰতিখন চহৰৰ নিখুত বিবৰণ দিয়া যেনেই অনুভব হয় ৷ অনুভব হয় বুলি এই কাৰনেই কৈছো কাৰন সেইবোৰ দেশলৈ মই কোনো দিনেই গৈ পোৱা নাই ৷ কিন্তু লেখকে ইমান সুন্দৰকৈ বৰ্ননা কৰে যে এনে লাগে যেন মই সেই চহৰখন দেখিছো কেতিয়াবা ৷ কেতিয়াবা কোনো কোনো উপন্যাসত ভাৰতৰ কোনো মহানগৰৰ কথাও উল্লেখ হয় ৷ উপন্যাসবোৰ পঢ়িলে ভাব হয় প্ৰতিখন উপন্যাস একো একোটা সঁচা কাহিনীৰ ওপৰত আধাৰিত ৷

এই উপন্যাসবোৰ পঢ়ি থাকোতে মই কল্পনা কৰো যদি কোনোবাই এনে এখন উপন্যাসত গুৱাহাটী বা ডিব্ৰুগড়ৰ কথা কৈ দিয়ে কেনে লাগিব বাৰু ! কেনে লাগিব বাৰু যদি এফ.বি.আই. এজেন্টজনে পান বজাৰৰ ‘ৰেবতী’ত বহি চিকেন চাউ খাই থাকে ! কেনে লাগিব বাৰু যদি এফ.বি.আই. এজেন্টজনে উংগাৰ এখনত উঠি খলিহামাৰিৰ পৰা চেপনলৈ গৈ থাকে !
পাছে তেনে কল্পনা যে অলীক বুজিব পাৰিছিলো কাৰন অসমৰ কোন কথাইনো ছিডনী ছেলডন, ৰবাৰ্ট লুডলাম, ফ্ৰেড্ৰিক ফৰচইথ, জেফ্ৰী আৰ্ছাৰ আদিক আকৰ্ষিত কৰিব ৷ নকৰে কেতিয়াও জানো ৷

তেওঁলোকে যদি নেলেখে নালাগে বাৰু ! অসমৰে কোনোবাই যদি তেনে এখন উপন্যাস লেখিলে হয় ! পাছে কাহিনীয়ে নাই কোনো, গতিকে ক’তনো আৰু উপন্যাস ওলাব ৷ মোৰ কল্পনা মোৰ মনৰ মাজতে থাকিল ৷

দুদিনমান আগৰ কথা ৷
হোটেলত বহি আমি কেইজনমানে আড্ডা মাৰি আছো ৷ বেছ ৰঙীন সন্ধিয়া ! আড্ডা জমি উঠিছে ৷ মোৰ বাহিৰে সেই আড্ডা বহি থকা বাকী কেইজন একো একোজন কোটিপতি ব্যৱসায়ী ৷ তাৰ এজনক ধেমালিতে ক’লো, ‘‘তই দেখোন মোক এক কোটিমান দি দিব পাৰ ৷ তোৰ ইমান টকা !’’

তেওঁ তাৰ পাছত মোক যিখিনি কথা শুনালে তাকে শুনি মোৰ মুখৰ মাত নোহোৱা হৈ গ’ল ৷ বুজি নাপালো কোটিপতি বন্ধুৱে মই সঁচাকৈ এক কোটি টকা বিচাৰিছো বুলি ভাবি তৎক্ষনাতে সাজি সাজি গোকাট মিছা কাহিনী এটা শুনাই দিলে নে ঘটনাটো সঁচা আছিল ৷

ঘৰলৈ আহি ভাবিলো সঁচাই হওঁক বা মিছাই হওঁক কাহিনী কিন্তু অসমৰ পৰা আৰম্ভ হৈ কেইবাখনো দেশ, দুখন মহাদেশ পাৰ হ’ল ৷ লগতে আছে বিদ্ৰোহী, আমেৰিকাৰ চোৰাংচোৱা সন্থা, সাংঘাতিক প্লট !!!!!!!!

কোনোবাই যদি লেখি দিলে হয় !