আজিকালি অকনমান সাৱধান হৈছো

‘‘ভিনদেউ, BTM Lay Out, কফী বৰ্ডৰ ওচৰত নামিব ৷ তাৰ পাছত ১০০ মিটাৰ মান আগুৱাই আহি বাওঁফালে যিটো ফ্লেট আছে তাৰ C-4লৈ উঠি আহিব ৷’’

মিঠাইৰ টোপোলা হাতত লৈ পালো গৈ খুলশালীৰ ঘৰ ৷ 
কলিং বেল বজাবলৈকে নাপালো, ‘‘আহক আহক ভিনদেউ ৷ জোতা খুলিব নালাগে ৷’’
জোতাৰ সৈতেই সোমাই গ’লো ৷ 

ভিতৰ সোমাই চকীখনত বহিবলৈ লওঁতেই এওঁৰ ফোন আহিল, ‘‘কি কৰি আছা ?’’
‘‘কি কৰি আছা মানে ? খুলশালীৰ ঘৰলৈ আহিছো ৷ ..........’’
ফোনত কথা পাতি পাতিয়ে চকী এখনত বহি দিলো ৷
ধমহ !!!!!!!!!
শব্দ এটা উঠিল ৷
ফোনত এওঁ সুধিছে, ‘‘সেইটো কিহৰ শব্দ ?’’

মই তেতিয়া খুলশালীৰ ফ্লেটৰ বহা কোঠাৰ মজিয়াত চিৎ ভেলেঙা খাই মাটিত শুই আছো ৷
ফোনটো যেনিবা কাণতে লাগি আছে ৷
এওঁ আকৌ চিঞৰিছে, ‘‘আৰে সেইটো কি শব্দ আছিল নোকোৱা কিয় ?’’
মই কেকাই কেকাই উত্তৰ দিলে, ‘‘মই বহি দিওঁতে চকীখন ভাঙি থাকিল ৷ শব্দটো যে শুনিছিলা সেইটো মই মাটিত বাগৰি পৰাৰ শব্দ আছিল ৷’’

পাছত এওঁ মোক গালি পাৰিছে, ‘‘তুমি অকনমান চাই চিতি বহিব নোৱাৰা নেকি ?’’
মনতে ভাবিছো, ‘‘তাৰ মানে আকৌ কি ? মই কি চাই - চিতি বহিব লাগে ?’’

বলে নোৱাৰি এওঁ বকিছে, ‘‘তোমাৰ লাজ নালাগে নে চকী ভাঙি থাকিল ?’’
মনতে ভাবিছো, ‘‘তাৰ মানে আকৌ কি ? দূৰ্বল চকী কিনিছে খুলশালীয়ে ৷ লাজ মই পাব লাগে নে তেওঁ ?’’

আজি কালি পাছে মই বহাৰ আগে আগে  চকীবোৰ অকনমান পৰীক্ষা কৰি লওঁ ৷

বীথিৰ ঘৰলৈ মাতি আছে, এনেয়ে কথাটো মনত পৰি গ‘ল কিবা ..........